Mu KARERE ka NYAMASHEKE, umugabo witwa Manirabona Corneille w’imyaka 30 ari gushakishwa n’inzego z’umutekano akurikiranyweho icyaha cyo gusambanya umwana we w’imyaka itandatu.
Ibi byabereye mu Mudugudu wa Mataba, Akagari ka Nyakabingo, Umurenge wa Macuba, aho uyu muryango usanzwe utuye.
Amakuru y’iki cyaha yatanzwe n’umugore w’ukekwaho icyaha, Mukamana Charlotte w’imyaka 28, akaba na nyina w’umwana, wahise atanga ikirego ku nzego zibishinzwe akimara kumenya ibyabaye.
Abaturage bo muri ako gace bavuga ko iki gikorwa cyabateye impungenge n’agahinda, basaba ko ukekwaho icyaha afatwa vuba akagezwa imbere y’ubutabera.
Inzego z’umutekano zatangiye iperereza ndetse zirimo gushakisha Manirabona, amakuru akavuga ko yaba yaratorotse akimara kumenya ko ari gukurikiranwa.
Umuyobozi w’Akarere ka Nyamasheke yasabye abaturage gukomeza kugira uruhare mu gukumira ibyaha, cyane cyane ibyibasira abana, ashimangira ko ubufatanye hagati y’abaturage n’inzego z’umutekano ari ingenzi mu kurengera uburenganzira bw’abana.
Yagize ati: “Turasaba ababyeyi n’abarezi kurushaho kwegera abana babo, bakabaganiriza no kubitaho, kuko ari bwo buryo bwiza bwo gukumira ihohoterwa rikorerwa mu ngo.”
Ku ruhande rwa Polisi, abaturage basabwe gukomeza gutanga amakuru ku gihe ku cyaha cyose babonye cyangwa bakeka, by’umwihariko ibyibasira abana.
Polisi yibukije ko ihohoterwa rikorerwa abana ari icyaha gikomeye, isaba abaturage kudaceceka ahubwo bagahita babimenyesha inzego zibishinzwe kugira ngo hafatwe ingamba zihuse.
Icyaha cyo gusambanya umwana kiri mu byaha bikomeye mu mategeko y’u Rwanda, kandi gihanishwa ibihano bikomeye birimo igifungo kirekire.
Isoko: Imbaho Nshya, Radio Rusizi
