Mu Karere ka Karongi humvikanye inkuru itangaje kandi ibabaje, aho umugabo yatawe muri yombi akekwaho kwica umusore w’imyaka 29, amushinja kumusambanyiriza umugore
Ibi byabereye mu Kagari ka Gisanze, mu Murenge wa Rubengera, mu ijoro ryo ku wa 20 rishyira ku wa 21 Mata 2026.
Amakuru ava mu baturage bavuga ko nyakwigendera yari amaze umunsi asangira n’umugore w’undi mugabo mu kabari ko muri ako gace. Nyuma yo kuhava, bombi bagiye ahantu hitaruye, aho bikekwa ko bari bagiye gukomeza umubano wabo mu ibanga.
Gusa ntibyatinze, kuko uwo mugabo bivugwa ko yari amaze iminsi akeka uwo musore, ngo yabasanze aho bari, havuka amakimbirane akomeye yarangiye umwe akubiswe ikintu gikomeye ku mutwe.
Uwaguye muri icyo gitero yahise ajyanwa kwa muganga ku Kigo Nderabuzima cya Rubengera, ariko kubera uburemere bw’imvune ze, yoherezwa ku Bitaro Bikuru bya Kibuye. Nubwo yitabwagaho, yaje gushiramo umwuka mu gitondo cyo ku wa 21 Mata Saa mbili n’iminota 47.
Ubuyobozi bw’inzego z’ibanze bwemeje iby’aya makuru, buvuga ko hari abantu bamaze gutabwa muri yombi barimo umugabo ukekwaho ubwicanyi ndetse n’umugore bivugwa ko ari we wari intandaro y’iki kibazo.
Umunyamabanga Nshingwabikorwa w’Umurenge wa Rubengera, Ayabagabo Faustin, yavuze ko iperereza rikomeje kugira ngo hamenyekane neza uko byagenze n’uruhare rwa buri wese.
Ati: “Hari abafashwe, iperereza rirakomeje. Turasaba abaturage kwirinda amakimbirane no kudafata amategeko mu maboko yabo.”
Iyi nkuru yongeye kwibutsa ubukana bw’amakimbirane ashingiye ku buhemu mu bashakanye, aho rimwe na rimwe ashobora kuvamo ibyaha bikomeye birimo no gutakaza ubuzima.
Isoko: Ubuyobozi bw’Umurenge wa Rubengera n’amakuru aturuka mu baturage bari hafi y’aho byabereye.
