Djihadi yasabye imbabazi mu rukiko, K John ahakana ibyaha akurikiranweho
Kuri uyu wa Mbere tariki ya 04 Gicurasi 2026, Urukiko Rwisumbuye rwa Nyarugenge rwaburanishije mu bujurire urubanza ruregwamo Uzabakiriho Cyprien uzwi nka Djihadi, Kalisa John uzwi nka K John, Kwizera Papy Nestor na Ishimwe François Xavier, bakurikiranyweho icyaha cyo gusakaza amashusho y’urukozasoni hakoreshejwe urusobe rwa mudasobwa.
Mu iburanisha, Djihadi yongeye guhakana ibyo aregwa, ariko asaba imbabazi anasaba ko yagabanyirizwa igihano cyangwa agasubikirwa. Urukiko rwamumenyesheje ko gusaba kugabanyirizwa igihano bikorwa n’uwemeye icyaha.
Ku ruhande rwa Kalisa John uzwi nka K John, yahakanye ibyaha byose aregwa, avuga ko atigeze asakaza ayo mashusho. Yongeyeho ko uwari watanze ubuhamya yamusabye imbabazi nyuma, avuga ko yari yabikoze atazi neza ukuri, abifata nk’”gutwika”.
Kwizera Papy Nestor we yasabye ko yasubikirwa igihano, agaragaza ko igihe amaze muri gereza cyamufashije kwiga no kwisubiraho, bityo akaba yiteguye kuba umuturage mwiza. Naho Ishimwe François Xavier we yakomeje guhakana ibyaha byose aregwa.
Iri buranisha ryibanze ku gusuzuma niba ubujurire bw’abaregwa bufite ishingiro, cyane cyane ku birebana n’ubuhamya bwatanzwe n’uko amategeko ajyanye n’ikoreshwa ry’ikoranabuhanga yubahirijwe.
Urukiko rwibukije abaregwa ko ibyaha bijyanye no gukoresha nabi imbuga nkoranyambaga bifatwa nk’ibikomeye, cyane cyane iyo bijyanye no gusakaza ibibangamira umuco n’uburenganzira bw’abandi.
Nanone, hagaragajwe ko kwemera icyaha bifite uruhare mu korohereza uregwa mu gihe cyo kugabanyirizwa ibihano, mu gihe ugihakana akomeza kuburana asobanura impamvu atacyemera.
Urukiko rwanzuye ko umwanzuro w’uru rubanza uzasomwa ku wa 19 Gicurasi 2026. Abaregwa bose bazamenyeshwa icyemezo kizafatwa hashingiwe ku bimenyetso byatanzwe n’impaka zabereye mu rukiko.
ISOOKO:Urukiko Rwisumbuye rwa Nyarugenge / Inkuru z’inkiko
